အချစ်ဆိုတဲ့ အခန်းရဲ့အဝေး

ကမ္ဘာကြီးထဲမှာ တစ်ယောက်တည်းနဲ့ ကမ္ဘာသေးသေးလေးကို ကျွန်တော် တည်ဆောက်ခဲ့ဖူးတယ်။ အဲဒါ ကျွန်တော့်ရဲ့ အခန်းထဲမှာပေါ့။ ကျွန်တော်နေတဲ့အခန်းလေးက သပ်ရပ်တယ်။ လုံခြုံတယ်။ နောက်ပြီး လှပတယ်။ နံရံတွေမှာဆိုရင် ဆေးရောင်ကို အစိမ်းရောင်လေးသုတ်ထားတယ်။ နံရံရဲ့တစ်ဖက်ခြမ်းမှာ ကျွန်တော့်ဓာတ်ပုံလေးတွေကို ကပ်ထားတယ်။ မျက်နှာချင်းဆိုင် အခြားတစ်ဖက်မှာ ပန်းချီကားလေးတွေ ချိတ်ဆွဲထားတယ်။ ကျွန်တော်နေခါစက ဆိုရင် သန့်ရှင်းသပ်ရပ်ပြီး သိပ်လှခဲ့တဲ့ အခန်းလေးပဲပေါ့ . . .၊  Fancy light လေးတွေနဲ့ ညအခါမှာဆိုရင် သိပ်လှတာပဲ။ မီးလုံးလေးတွေကို အပြာရောင်လေးတွေဖောက်ပြီး တပ်ထားတယ်။ အဖြူနဲ့ အပြာစပ်ပြီး ထွက်လာတဲ့ အလင်းရောင်ကို ခပ်အုပ်အုပ် အ၀ါလေးက မှေးမှိန်မှိန်လေး ဖြန်းပေးထားတယ်။ လရောင်ဆန်ဆန်ဖြစ်အောင် မီးရောင်ကို ဆင်ထားတာ။ လရောင်ဆိုတာက လူတွေရဲ့ စိတ်နှလုံးကို လှုပ်ရှားစေတတ်တယ်။ အထူးသဖြင့် အချစ်နဲ့ပတ်သက်လာရင် နိုးထမှုကို ပေးစေတဲ့ အရောင်ပဲပေါ့။ လူသားတွေအတွက် လရောင်ဟာ Emotional Mind ကို လှုံ့ဆော်ပေးတယ်လို့ ကြားဖူးပါတယ်။ အထူးသဖြင့် လပြည့်ညရဲ့ လရောင်က ပိုပြီး အစွမ်းရှိတယ်လို့ ကြားဖူးတယ်။ လပြည့်ညမှာ ချိန်းတွေ့ကြလို့ ပေါင်းဖက်သွားတဲ့ စုံတွဲတွေလည်း မနည်းတော့ဘူး။ လရောင်က ပေးစွမ်းတဲ့ Emotional Light ကို သိပ်ကြိုက်တယ်။ အဲဒါကြောင့် တမင်ဖန်တီးထားခဲ့တယ်။ ဒါကြောင့် အခန်းလေးက အရမ်းကို ခမ်းနားလှတဲ့ ကိုယ်ပိုင်နန်းတော်တစ်ခုလို ဖြစ်ခဲ့ရတယ်။ အခန်းလေးကို သိပ်ချစ်လွန်းလို့ ဘယ်မှတောင်မသွားဘူး၊ အခန်းထဲမှာပဲ နေခဲ့တယ်။ ကျွန်တော်အိပ်နေရင် အခန်းလေးက ကျွန်တော့်ကို လုံခြုံစွာ ထွေးပိုက်ထားတယ်။ သူ့ရဲ့ ရင်ခွင်ထားပြီး ကျွန်တော်အိပ်နေရင် အခန်းလေးကလည်း အလိုက်သိသိ တိတ်ဆိတ်နေတယ်။ ကွန်ပျူတာနဲ့ ဂိမ်းတွေကစားချိန်မှာ အခန်းလေးက ကျွန်တော့်ကို အပူဒဏ်ခံနိုင်အောင်လို့ လေးအေးတွေကို အ၀င်ခံခဲ့တယ်။ ကျွန်တော်စာဖတ်နေချိန်မှာ အခန်းလေးက ပြင်ပအသံတွေ မ၀င်လာအောင် ထိန်းချုပ်ထားတယ်။ ဒီလိုနဲ့ အမှတ်တမဲ့အချိန်တွေ ကုန်ဆုံးခဲ့ရတယ်။ ရွေ့သွားမှန်းမသိလိုက်ရတဲ့ နာရီတွေက စုပေါင်းပြီး လက်ကျန်ရှင်းတမ်းကို ချပြလိုက်တော့ နှစ်တစ်နှစ်ကို ကုန်ဆုံးရတော့မယ်ဆိုတာ ကျွန်တော်သိလိုက်ရတယ်။ အဲဒီလို ကုန်ဆုံးသွားခြင်းနှင့်အတူတူ ကျွန်တော့်အခန်းလေးလည်း အိုမင်းသွားခဲ့ရပြီ။ ဒါပေမယ့် အချိန်တွေက လွန်သွားခဲ့ပြီလေ။ အခန်းထဲမှာ ဖုန်တွေတင်လို နေလေပြီ။ ဖုန်တွေကို သုတ်သင်လိုက်ပေမယ့် ဖတ်လက်စ စာအုပ်တွေက ကြမ်းပြင်မှာ ပြန့်ကျဲလို့ပေါ့။ ဆေးလိပ်တိုတွေ၊ ပြာစတွေကလည်း ကာရံတွေမဲ့နေသလို စာအုပ်တွေကလည်း သစ်ရွက်ကြွေ မြေမှာခသလို ဖရိုဖရဲနဲ့ပေါ့။  အဲဒါနဲ့ အခန်းထဲမှာ ကျွန်တော် နေချင်စိတ်မရှိတော့ဘူး ဖြစ်သွားတယ်။ ဒါကြောင့် အခန်းလေးကို ကျွန်တော် စွန့်ခွာခဲ့တယ်။ စွန့်ခွာခဲ့တယ်ဆိုတာ အဝေးကြီးကိုပါ။ ပြန်မလာတော့ဘူးဆိုတဲ့ ဆုံးဖြတ်ချက်နဲ့ ထွက်လာခဲ့တယ်။ ဒါပေမယ့် ဒီတကြိမ်မှာတော့ ကျွန်တော်စဉ်းစားလိုက်မိတယ်။ ကျွန်တော်သာ အခန်းလေးတစ်ခန်းဖြစ်ခဲ့ပြီး၊
အခန်းလေးကလည်း လူတစ်ယောက်ဖြစ်ခဲ့မယ်ဆိုရင် ကျွန်တော့်ကိုလည်း အခန်းလေးက ကျွန်တော်လုပ်သလိုပဲ ပြန်လုပ်မှာလားလို့လေ . . .။ နောင်တနဲ့ ဂရုဏာသက်မိချိန်မှာ

ကျွန်တော်က အခန်းရဲ့ အဝေးကို ရောက်နေပေပြီ။ ကျွန်တော် ထိန်းသိမ်းစွာ မနေတတ်ခဲ့တော့ အခုဆိုရင် အခန်းလေးထဲမှာ ညစ်ပတ်လို့နေချေပြိ။ နံရံတွေလည်း ဆေးရောင်တွေမှိန်လို့၊

ကြမ်းပြင်တွေကလည်း ဖုန်အထပ်ထပ်နှင့် အရောင်မှိန်လို့နေလေပြီလေ။ သက်ရှိတစ်ယောက်ရဲ့လုပ်ရပ်က သက်မဲ့နေတဲ့ အခန်းအပေါ်မှာ တော်တော်ထိခိုက်နစ်နာသွားခဲ့ရပြီလေ။ သူသာ သက်ရှိဖြစ်မယ်ဆိုရင် ကျွန်တော့်ကို အပြစ်တင်လို့ဆုံးမှာ မဟုတ်တော့ဘူး။ ဒါပေမယ့် အခန်းလေးက ကျွန်တော့်ကို ဘာမှပြန်လည် တုံ့ပြန်ခြင်းမရှိပါဘူး။ ဒါပေမယ့် အဲဒီအဖြစ်အပျက်လေးကို ရင်ထဲမှာထားပြီး သင်ခန်းစာတွေ ယူခဲ့မိတယ်။ အဲဒီလို အဖြစ်မျိုးဆိုတာကိုလည်း အချစ်နဲ့ကြုံခဲ့ရတဲ့အခါ သိခဲ့ရတယ်။ အချစ်ဆိုတဲ့အရာလေးကို အခန်းလေးနဲ့ အစားထိုးပြီး ခံစားကြည့်လိုက်တယ်။ အချစ်ဆိုတာ သက်ရှိက ဖန်ဆင်းလိုက်တဲ့ သက်မဲ့အရာလေးပါ။ ဒါပေမယ့် အသက်သွင်းခြင်းကို ခံခဲ့ရတော့ အသက်ဝင်သလိုလိုဖြစ်သွားတဲ့အခါ အခန်းလေးအပေါ်မှာ ကျွန်တော် ဂရုဏာသက်မိသလိုမျိုး သနားခြင်းတွေ ဖြစ်လာခဲ့ရတယ်။ အဲဒါကြောင့် အခုရရှိနေတဲ့ အချစ်ကို ကိုယ်က စတင်ပိုင်ဆိုင်ပြီဆိုကတည်း အခန်းတစ်ခန်းအဖြစ်နဲ့

စည်းစနစ်ရှိရှိ နေထိုင်တတ်ရင် လူသားတိုင်းအတွက် တန်ဖိုးရှိတဲ့အခန်း၊ တန်ဖိုးရှိတဲ့ အချစ်ဖြစ်လာမယ်လို့ ယုံကြည်ရတာပေါ့။ ဒါပေမယ့် ကျွန်တော်ကိုယ်တိုင် အခန်းလေးနဲ့ ဝေးနေခဲ့ရတာ အတော်ကြာခဲ့ပြီ။ ဒီအချိန်ဆိုရင် အခန်းလေးရဲ့နံရံပေါ်မှာ ကျွန်တော့်ပုံရိပ်တွေ အရင်လိုပဲ ကျန်နေသေးရဲ့လား? ကျွန်တော့်ရဲ့ အသုံးအဆောင်တွေကို အခန်းလေးက ဆက်လက်ပြီး ထိန်းသိမ်းထားနေဆဲလား? ကျွန်တော်ပြန်လာချိန်ကို  အခန်းလေးက စောင့်မျှော်ရင်းနဲ့ တံခါးကို ဖွင့်ထားဆဲလား? ကျွန်တော် အမှတ်တရဖြစ်မိတိုင်း ရေးမိတဲ့ကဗျာတွေက အခန်းရဲ့မျက်နှာကျက်မှာ ရှိနေတုန်းပဲလား?

မေးခွန်းတွေများစွာနဲ့ မျက်ရည်လည်လို့ တွေးမိလိုက်တိုင်း နောက်ပြန်လို့ လှည့်ချင်တဲ့ ကမ္ဘာတစ်ပတ်ကို စိတ်ကူးရင်းနဲ့သာ ရှေ့ကို ရွေ့လျားနေမှန်းမသိ

ခရီးဆက်နေခဲ့ရပေပြီ . . . ။ ဒါပေမယ့် ကိုယ်ပိုင်ဆိုင်တဲ့ အခန်းလေးကိုတော့ တနေ့မှာ ပြန်ရောက်ဦးမယ်ဆိုတဲ့ မျှော်လင့်ချက်ကတော့ ရှင်သန်ဆဲပဲပေါ့. . .။

အဲဒါ အချစ်ဆိုတဲ့ အခန်းလေးပါပဲ။ မျှော်လင့်ချက်ဆိုတာ လူသားတိုင်းမှာ ပိုင်ဆိုင်ကြသလို အခန်းလေးရဲ့ မျှော်လင့်ချက်ကရော ကျွန်တော့်အပေါ်မှာ အသက်ပြန်ဝင်လာနိုင်ပါ့မလား။
အခန်းတစ်ခန်းအနေနဲ့ နေရာယူခဲ့တဲ့အချစ်ကလည်း ကျွန်တော့်ရင်ထဲမှာ အခန်းတစ်ခန်းဖြစ်ခဲ့ရလေပြီလေ။ အခန်းတစ်ခန်းအဖြစ် ဖြစ်တည်နေတုန်းက တန်ဖိုးမထားခဲ့ဘူး။ ဝေးတဲ့အခါမှ တန်ဖိုးထားရမှာသိလာရတယ်။ လက်ဆုပ်လက်ကိုင် ဖြစ်နေတုန်းမှာ ဘယ်အရာမဆို ဘယ်သူမှ တန်ဖိုးမထားတတ်ကြသလိုပါပဲလေ . . .။ မရတော့တဲ့အချိန်ကျရင် အဲဒီအရာတွေဟာ တန်ဖိုးရှိလာတတ်ကြတယ်။ အဲဒီလိုပဲ ကျွန်တော်လည်း ဝေးသွားပြီးတဲ့အခါမှ တန်ဖိုးထားရမှန်း သိလာရတယ်။ ပိုပြီး မြတ်နိုးရကောင်းမှန်းလည်း နားလည်ခဲ့တယ်။ အဲဒါ အချစ်ဆိုတဲ့ အခန်းလေးပါပဲ. . . ။ အချစ်နဲ့ ဝေးခဲ့ရတဲ့ ကျွန်ုပ်အတွက် ဆုတောင်းသံများကိုသာ နားစွင့်နေရင်း မျှော်လင့်ခြင်းများစွာနဲ့ အချစ်ဆိုတဲ့ အခန်းလေးရဲ့ ပိုင်ရှင် အစစ်အမှန်ဘ၀ကိုသာ တောင့်တနေမိပါတော့တယ် . . .။