``ဘာနဲ့စားမလဲ အစ်ကို``
အလိုလိုနေရင်း မိုးမိလို့ စိတ်ညစ်နေရတဲ့အထဲမှာ ထမင်းစားဖို့ ဖိတ်ခေါ်နေတဲ့ မိန်းမကြီးကို ဘယ်လို ပြန်ဖြေရမှန်းမသိဖြစ်နေမိသည်။ နဂိုကတည်းက စိတ်အချဉ်ပေါက်နေလို့ ညစ်နေချိန်မှာ ဒီလို အမေးခံရတော့ ရွဲ့ပြီး ပြန်ဖြေလိုက်မိ၏။
``ပါးစပ်နဲ့စားမယ်လေ``
ဖြေတုန်းကတော့ ဘာရယ်တော့ မဟုတ်ပါဘူး။ နောက်တတ်တဲ့အကျင့်က ရှိနေတော့ နောက်မိတာပါ။ ဒါကို အဒေါ်ကြီးက
``အေးဟဲ့ …….. ရှင်က ပါးစပ်နဲ့မစားလို့ ဘယ်အပေါက်နဲ့စားချင်သေးလို့လဲ``
``အဲ အဲဒီလို သဘောမျိုးနဲ့ ပြောတာမဟုတ်ပါဘူးဗျာ။ ရုတ်တရက်ကြောင်သွားလို့ ဖြေမိတာပါ``
ဆင်ခြေပြန်ပေးကြည့်သည်။ မရပါ။ အဒေါ်ကြီးကလည်း ရောင်းမကောင်းလို့ စိတ်အချဉ်ပေါက်နေပုံ ရပါသည်။ ပိုဆိုးလာပါသည်။
``ပုံစံကိုက ကုပ်ချောင်းချောင်းနဲ့ ဆိုင်ထဲဝင်လာပြီး ထမင်းမစားပဲ ပြန်ထွက်ကြည့်။ ထမင်းမစားနိုင်အောင် လုပ်ပေးလိုက်မယ်``
ဘုရား ဘုရား စိန်ခေါ်လိုက်ပုံက တော်ရုံဆိုရင် သေသွားလောက်တယ်။ အခုနက ထမင်းစားနေသူနှစ်ယောက်က စားပြီးသွားပုံရပါတယ်။
``ဘယ်လောက်ကျလဲဗျ``
အသံထွက်လာတော့မှ အဒေါ်ကြီးလည်း ပိုက်ဆံတွက်နေတော့ သူ့ကို ပြောဖို့ မေ့သွားပုံရသည်။ ဘာမှ မပြောတော့။ မိုးလေးကလည်း စဲသွားပြီး ဖွဲဖွဲလေးပဲကျတော့တာမို့ အဒေါ်ကြီးပိုက်ဆံအမ်းနေတုန်း လစ်ထွက်လာခဲ့မိတယ်။ မှတ်တိုင်ရောက်တော့ ကားက အဆင်သင့်တွေ့လို့ ကားပေါ်ကို တက်သွားမိတယ်။ ကားကလည်း လူတွေအပြည့်နဲ့ အထဲမှာ ကြပ်ညပ်နေပြန်တယ်။ စပယ်ယာကို ပိုက်ဆံပေးပြီး လက်တန်းပေါ်ကို လှမ်းအကိုင်မှာ
``အား``
မိန်းကလေးအသံတစ်သံ အော်သံကြောင့် နောက်လှည့်ကြည့်တော့ ခပ်ချောချော မိန်းကလေးတစ်ယောက် မျက်နှာကို ရှုံမဲ့လို့နေပြန်တယ်။ သူက အောက်ကို လက်ညှိုးထိုးပြတယ်။ သူ့ခြေထောက်ကို နင်းမိနေတာကိုး။
``ဆောရီးပါဗျာ --- ဆောရီးပါ မမြင်လို့ပါ တောင်းပန်ပါတယ်``
မိန်းကလေးကို တောင်းပန်နေတုန်း ထိုမိန်းကလေးက
``ဟယ် ဘယ်သူများလဲလို့ ဒါရိုက်တာ သားဦးပါလား . . . ဘယ်သွားမလို့လဲဟင် ဒါရိုက်တာကြီးလည်း ကျွန်မတို့လို လိုင်းကားစီးတာပဲနော် …. ခစ် ….. ခစ်……``
ခက်ပါပြီ။ သူကြော်ငြာဝင်ခါမှ ကားတစ်စီးလုံး ရှိရှိသမျှလူတွေက ဝိုင်းကြည့်နေပြန်တယ်။ ဘာပြောရမှန်းမသိ မျက်နှာကြီး အောက်ကိုငုံ့ထားကာမှ
``၆မိုင်ခွဲဆင်းမှာ ပါသေးလား``
စပယ်ယာမေးသံကို ကြားလိုက်တော့ ပျာပျာသလဲ
``ပါတယ် . . . မှတ်တိုင်ပါတယ်`` ဆိုပြီး ပြေးဆင်းခဲ့ရပါတယ်။
အိမ်ကိုရောက်မှပဲ
``ဟင်း`` ခနဲ သက်ပြင်းချနိုင်တော့ပါတယ်။
- - - - - - - - - - × - - - - - - - - - - - × - - - - - - - - - - -
နောက်တစ်နေ့
``မီးသမား အဆင်သင့်ပြင်``
``ကင်မရာ ချိန်မယ်``
``မင်းသား ရှေ့ကိုနည်းနည်းလောက် လျှောက်လိုက်ပါ``
``ဟိုအခြောက်မ နင်နောက်ကိုဆုတ်နေ``
တပြည့်ကျော် ဝင်းမိုးက အော်လံတစ်ခုနဲ့ အလုပ်တွေလုပ်လို့။ မင်းသမီးမလာသေးလို့ စိတ်ပူပြီး လည်တဆန့်ဆန့်လုပ်နေရတဲ့အချိန်မှာ မင်းသမီးကား ရောက်လာပြန်တယ်။ ကားပေါ်ကဆင်းလာပါပြီ။ ပထမဆုံးဆင်းလာတဲ့သူက မင်းသမီးရဲ့ အလှဖန်တီးရှင် မာမီအေး၊ နောက်ကဆင်းလာတာ မင်းသမီးအမေ၊ နောက်ပြီး မင်းသမီးရဲ့ မောင်လေး။ ပြီးတော့ ကားဆရာ။ နောက်ဆုံးမှ မင်းသမီးက ပါးစပ်ကို လက်နဲ့ကာပြီး သမ်းဝေရင်း ဆင်းလာပါတယ်။ ခက်ပြီ။ ရှုတင်လာတဲ့ မင်းသမီးက အိပ်ရေးဝပုံ မပေါက်သေးဘူး။ မျက်တွင်းကလည်း ချိုင့်နေပြီ။
``မင်းသမီး နေမကောင်းဘူးလား။ နောက်ကျနေလို့ စိုးရိမ်နေတာ``
``ဟုတ်တယ် အိပ်ရေးမဝဘူးလေ။ ညက ကိုကိုနဲ့ အင်တာနက်မှာ စကားပြောတာ ညဥ့်နက်သွားလို့ . . . ဒီနေ့ ရိုက်ကွင်းဖျက်လို့ရမလားဟင်၊ အိပ်ချင်သေးတယ် . .. ဝါး``
``ဒုက္ခပါပဲ မင်းသမီးရယ်၊ ပရိုဂျူဆာက ကျွန်တော့်ကို ဆဲလိမ့်မယ်ဗျ``
``အာာ . . . . ဒါရိုက်တာလုပ်ပြီး ဒီလောက်တောင် မလှည့်တတ်ရင် လုပ်မစားနဲ့တော့၊ တခြားကတ်တွေကို ဆင်ပြီးရိုက်လိုက်နော်၊ အိမ်ကိုပဲ ပြန်တော့မယ်``
ဆိုပြီး ကားပေါ်ကို ပြန်တက်သွားတယ်။ နောက်ပြီး သူ့လူတွေကို လှမ်းခေါ်ပါတယ်။ မင်းသမီးအမေကြီးက
``နေပါဦး သမီးရယ်၊ အိပ်ချင်ရင် ကားပေါ်မှာ အိပ်နော်၊ ရှုတင်ရောက်တုန်း ရှုတင်ထမင်း ရှုတင်ဟင်းလေး စားပြီးမှာပြန်တာပေါ့နော် ဟုတ်ပြီလား``
အော် မင်းသမီးအနားက မင်းသမီးအမေလည်း ရှုတင်ထမင်း ကြိုက်တာကိုးလို့ စိတ်ထဲကပဲ ရေရွတ်မိပါတော့တယ်။
- - - - - - - - - - × - - - - - - - - - - - × - - - - - - - - - - -
ဒီနေ့ ရှုတင်နားရက်။ အိမ်မှာအနားယူမိတယ်။ သွားချင် လာချင်တဲ့စိတ်လည်းမရှိ။ ပင်ပန်းတဲ့ရက်တွေက ဆက်နေတားကိုး။ တစ်ယောက်တည်းသမားဆိုတော့ ထမင်းဟင်းက ကြုံသလိုစားနေရပါတယ်။ ဒီနေ့အတွက်ကတော့ ရပ်ကွက်ထဲက ကုန်စုံဆိုင်ကပဲ ဘဲဥဝယ်ပြီး မွှေကြော်နဲ့လွေးဖို့ စိတ်ကူးပြီး ကုန်စုံဆိုင်ကို ထွက်လာမိတယ်။
``ဘဲဥ တစ်လုံး ဘယ်လောက်လဲဗျ``
``၁၂၀ပါ အစ်ကို . . . ဘယ်နလုံးယူမလို့လဲ``
``ဟာ . . . ဘဲဥကလည်း ၁၂၀ ပေးပြီး သေးလိုက်တာ``
``ဟုတ်တယ်ရှင့် . . . အဲဒါက အပျိုဥတာလေ. . . ကျွန်မဥရင် ဒီ့ထက်တော့ ကြီးနိုင်ပါတယ်``
``ဟား ဟား ဟား ခင်ဗျားက ရယ်စရာတော်တော် ပြောတတ်ပါလား``
``ဪ. . . ဒါရိုက်တာကို အလကား စတာပါတော် . . . ကျွန်မက ဥရအောင်ဘဲမှမဟုတ်တာ``
``ဘဲမဖြစ်တာက တော်သေးတာပေါ့နော့ . . . တော်ကြာ ကြက်ဖြစ်ရင်တော့ ပိုဆိုးသွားလိမ့်မယ်``
ပြောတုန်းကတော့ သတ္တဝါကြက်ကို ပြောတာပါ။ ဘယ်လို နားလည်သွားတယ်တော့ မသိ။
``ရှင်က ကျွန်မကို ဘယ်လို အစားထဲက ထင်လို့လဲ။ ယောကျာ်းသေလို့ မုဆိုးမဖြစ်နေတာကို ရှင်က ထိချင် ရိချင်တယ်ပေါ့ . .. လာကြပါဦး အရပ်ကတို့ရဲ့ . . . ဒီမှာ ကျွန်မကို . . .``
လူတွေကလည်း ဝိုင်းလို့အုံလို့ ကြည့်နေကြပြီ။ ရှက်လိုက်တာ။ ဘယ်လိုရှင်းရမှန်းကိုမသိနိုင်အောင် ဖြစ်နေကာမှ ရပ်ကွက်လူကြီးရောက်လာပြီး ဖြေရှင်းပေးတယ်။ ရှင်းပေးပုံက -
``အေးကွယ်. . . အချင်းချင်းတွေပဲ တစ်ရပ်ကွက်သားအချင်းချင်းတွေ ပြေလည်အောင် ညှိလိုက်ကြ . . . ညဉ်းကလည်း ဈေးရောင်းတာ ကြည့်ရောင်းပေါ့ . . . ဈေးခေါ်တာ မများစေနဲ့။ မင်းကလည်း ကြိုက်ဈေးရမှ ယူလေ . . . ဟုတ်ပြီလား``
ခက်ပြီ။ လူကြီးရှင်းကာမှ ထောင်လုံးလုံးကျမယ့်အရေးကို ရောက်ရပြီ။
တော်ပြီ။ ဘာမှ မဝယ်တော့ဘူး။ ပြန်တာပဲကောင်းတယ်ဆိုပြီး ရုတ်တရက်လှည့်ထွက်လိုက်တယ်။ လူတွေက လမ်းဖယ်ပေးကြတယ်။ ဟိုမုဆိုးမကတော့ ငိုနေဆဲပါ။ မတိတ်သေးဘူး။ ဆိုင်ရှေ့ကနေ ခြေလှမ်းလို့ သုံးလှမ်းတောင် မပြည့်တတ်သေးဘူး။ မုဆိုးမက ငိုသံပါကြီးနဲ့ လှမ်းအော်လိုက်သေးတယ်။
``ကျွန်မဥရင် လာဝယ်ပါဦးနော်`` တဲ့
- - - - - - - - - - × - - - - - - - - - - - × - - - - - - - - - -
ကံကြမ္မာကပဲ နိမ့်နေသလား။ လူကပဲ ညံ့နေသလားတော့ မပြောတတ်။ နေ့စဉ်နှင့်အမျှ အဆင်မပြေမှုတွေနဲ့ ရင်ဆိုင်နေရဆဲ ဒါရိုက်တာ သားဦးတစ်ယောက် ဗေဒင်ဆရာဆီသွားပြီး ယတြာချေမယ်ပေါ့။ အဲဒါနဲ့ ကျိုက္ကဆံဘုရားထဲက ဗေဒင်ဆရာဆီကို သွားမေးပြီး ယတြာချေခဲ့တယ်။ ဗေဒင်ဆရာကလည်း ဟောပေးလိုက်တယ်။ ဒီကပြန်တာနဲ့ အားလုံးကို အဆင်ပြေစေရမယ်တဲ့။ အဆင်ပြေလိုက်ပုံများ ဆူးလေကို ကားပြန်စီးတော့ ပိုက်ဆံအိတ် ခါးပိုက်နှိုက်ခံရတယ်။ စပယ်ယာကို ပြောပြီး ကားခမပေးပဲ စီးခဲ့ရတယ်။ ဆူးလေရောက်မှ သူငယ်ချင်းတစ်ယောက်ဆီဝင်ပြီး ပိုက်ဆံချေး၊ ပြီးတော့ ၆ မိုင်ခွဲကို ပြန်မယ်ပေါ့။ ကိုယ့်အတွေးနဲ့ကိုယ် စဉ်းစားရင်း ဒီနေ့လည်း ဘာတွေ အဆင်မပြေဖြစ်ဦးမယ်ဆိုတာကို ရင်တထိတ်ထိတ်နဲ့ လိုင်းကားပေါ် တက်လာခဲ့ပါတယ်။ စဉ်းစားတာက ဘယ်အထိရောက်သွားတယ်တော့ မသိဘူး။ ဆင်းရမယ့် မှတ်တိုင်က ၆ မိုင်ခွဲမှာ။ မှတ်တိုင်ကျော်ပြီး ပါသွားတာ သတိရမှ ပြန်ကြည့်ချိန်မှာတော့ မင်္ဂလာဒုံက ဝါယာလတ်မှတ်တိုင်ကို ရောက်နေပါပြီ။ အော်…… မှတ်တိုင်က တော်တော် ကျော်ခဲ့တာပဲ။ ဗေဒင်ဆရာဟောတာကတော့ ဒီကနေပြန်တာနဲ့ အဆင်ပြေပြီတဲ့။ အခုထိတော့ အဆင်မပြေတာတွေပဲ ဆက်တိုက်ကြုံရတုန်းပဲဟ။ သို့သော် ကိုယ့်အကြောင်းနဲ့ ကိုယ်ကံပဲလေလို့သာ စိတ်ကို လျော့ချပြီး အိမ်ပြန်ဖို့ ခြေလှမ်းပြင်လိုက်တော့မှ လွယ်နေကျ လွယ်အိတ် ကားပေါ်မှာ ကျန်ခဲ့မှန်း သိရပြန်တယ်။ ကားကတော့ ထွက်သွားလေပြီ။ ဘယ်တတ်နိုင်ပါ့မလဲ။ နိဗ္ဗနပစ္စယော၊ ဟောတုပေါ့။ ရေစက်ချလိုက်ပါတယ်။ ဒီလိုနဲ့ အိမ်အပြန်လမ်းမှာတော့ မနက်ဖန်အတွက်လည်း အဆင်မပြေခြင်းများကို စောင့်မျှော်လျက် အတိတ်က အဆင်မပြေခြင်းများကို ပြန်စဉ်းစားရင်း မိန့်မိန့်ကြီး ပြုံးလျက်သား ဒါရိုက်တာ သားဦးတစ်ယောက် အိမ်ကိုပြန်ရောက်ဖို့ ကားပြန်စီးရပေဦးမည်။
အစဉ်လေးစားလျက်
သားဦး
No comments:
Post a Comment